काठमाडौं । सहकारी ठगी छानबिन गर्ने संसदीय समितिको क्षेत्राधिकार टुंगो लगाउन आज कार्यदलको बैठक बस्दै छ । कार्यदल गठन भएपछि अहिलेसम्म दुई पटक मात्र बैठक बसेको छ ।
कानुन, न्याय तथा संसदीय मामिला मन्त्रालयमा दिउँसो ३ बजे बैठक बस्ने तय भएको छ । यसअघि बसेका बैठकमा दल अडानबाट पछि हट्न नसक्दा कार्यादेशका विषयमा सहमति जुट्न सकेको थिए ।
आज बस्ने बैठकमा पनि दलहरु अडानबाट टसमस नहुने अवस्थामा छन् । सत्तापक्ष र प्रतिपक्षीका आ–आफ्नै स्वार्थ छन् । सत्तापक्षले समग्र सहकारीको छानबिन गर्नुपर्ने गरी समितिको क्षेत्राधिकार तोक्नुपर्ने बताएको छ । तर प्रमुख प्रतिपक्षी नेपाली कांग्रेसले उपप्रधान तथा गृहमन्त्री रवि लामिछाने र उनीसँग सम्बद्ध संस्थाको नाम उल्लेख गरेर छानबिन गर्नुपर्ने माग गरेको छ ।
कांग्रेसको यही मागमा सहमति नजुटेकाले कार्यादेश टुंग्याउने जिम्मा पाएको कार्यदलको बैठक निष्कर्षविहीन बन्दै आएको छ । यसअघि बसेका तीनवटा बैठक सत्तापक्ष र प्रमुख प्रतिपक्ष नेपाली कांग्रेस आ—आफ्नो अडानमा रहेकाले निष्कर्षमा पुग्न सकेका थिएनन् ।
नेपाली कांग्रेस संसदीय दल र केन्द्रीय समितिको संयुक्त बैठकले सहकारीहरूको बचत ठगी, अपचलन, हिनामिना र दुरुपयोग जाँचबुझ गर्न र गृहमन्त्रीलाई समेत छानबिनको दायरामा ल्याउन सडक संघर्ष गर्ने निर्णय गरिसकेको छ । यसले कार्यादेशको सहमतिलाई अझ टाढा धकेल्न सक्छ ।
कानुन, न्याय तथा संसदीय मामिला मन्त्री पदम गिरी संयोजक रहेको कार्यदलमा नेकपा (एमाले) का प्रमुख सचेतक महेश बर्तौला, कांग्रेस सांसद जीवन परियार र रास्वपा सांसद शिशिर खनाल सदस्य छन् ।
