काठमाडौं । इरानका राष्ट्रपति इब्राहिम रायसी सवार हेलिकोप्टर दुर्घटनास्थलको क्षेत्रमा उद्धारका लागि रुसले विशेष टोली पठाएको छ । राष्ट्रपति सवार हेलिकोप्टर दुर्घटना भएपछि खराब मौसमका कारण उद्धारमा समस्या भएपछि रुसले विशेष टोली पठाएको हो ।
खराब मौसमका कारण हिजो हेलिकोप्टर दुर्घटनामा परेको बताइएको छ । राष्ट्रपतिको खोजी जारी रहेको र उनको अवस्थाबारे कुनै जानकारी नआएको इरानका सरकारी सञ्चारमाध्यमले जनाएका छन् ।
रुसले राष्ट्रपति राईसीको खोजीमा मद्दत गर्न इरानमा उद्धार टोली पठाएको रुसी सरकारी सञ्चारमाध्यमले जनाएका हुन । उद्धार टोलीलाई राष्ट्रपति सवार हेलिकोप्टर दुर्घटना भएको इरानी सहर ताब्रिजमा उडाइने बताइएको छ । राष्ट्रपति सवार हेलिकप्टर पूर्वी अजरबैजानको पश्चिमी प्रान्त जोफा क्षेत्रमा दुर्घटना भएको थियो ।
खराब मौसमका कारण दुर्घटनापछिका अन्य विवरण प्राप्त हुन नसकेको अन्तर्राष्ट्रिय सञ्चारमाध्यमले जनाएका छन् । हेलिकोप्टरमा विदेशमन्त्री होसेन अमीर–अब्दुल्लाहियानसमेत सहभागी भएको बताइएको छ ।
दुर्घटना वारजाघन सहरनजिकै दिमारको पहाडी संरक्षित वन क्षेत्रमा भएको हो । ६३ वर्षीय राष्ट्रपति रायसी आइतबार प्रान्तको भ्रमणमा आएका थिए । त्यहाँ उनले आफ्ना अजरबैजानी समकक्षी इल्हाम अलिएभसँग मिलेर दुई देशको सीमामा बाँध परियोजनाको उद्घाटन गरेका थिए ।
