• १४ जेष्ठ २०८१, सोमबार
  •      Mon May 27 2024
  •   Unicode
Logo

आज मदन–आश्रित स्मृति दिवस विभिन्न कार्यक्रम गरी मनाइँदै



काठमाडौं । नेकपा (एमाले)का तत्कालीन महासचिव मदन भण्डारी तथा संगठन विभाग प्रमुख जीवराज आश्रितको स्मृति दिवस आज विभिन्न कार्यक्रम गरेर मनाइँदै छ । २०५० साल जेठ ३ गते चितवनको दासढुंगामा रहस्यमय जिप दुर्घटना हुँदा मदन–आश्रितको निधन भएको थियो ।

दुवै नेताको निधन भएको दिनको सम्झनामा जेठ ३ गते ‘मदन–आश्रित स्मृति दिवस’ मनाइन्छ । नेकपा एमाले पार्टीको केन्द्रीय कार्यालय र मातहातका कमिटीसहित तीनका भ्रातृ संगठनले विभिन्न कार्यक्रम गरी मदन–आश्रितको सम्झनामा विभिन्न कार्यक्रम गर्दै आएका छन् ।

‘बन्दुकको नालबाट मात्रै सत्ता कब्जा हुन्छ’ भन्ने परम्परागत कम्युनिस्ट मान्यतालाई चिर्दै ‘जनताको मतद्वारा नै सत्ता कब्जा हुन्छ’ भन्ने मान्यताका साथ ‘जनताको बहुदलीय जनवाद’ सिद्धान्तका प्रतिपादक नेताको रुपमा मदन भण्डारीलाई कम्युनिस्ट आन्दोलनको इतिहासमा सम्झिन्छ ।

उनको सिद्धान्तपछि विश्वभरिका कम्युनिस्ट ‘बुलेट’ बाट होइन, ‘ब्यालेट’ वाट श्रमजीवि वर्गको सत्ता स्थापनाका लागि लाग्नुपर्छ भनेर प्रेरित हुन पुगेको राजनीतिक विश्लेषकले बताउँदै आएका छन् ।

मदन भण्डारी र जीवराज आश्रितको कार दुर्घटनाको रहस्य भने ३१ वर्षसम्म पनि रहस्यमै छ । उहाँहरुको निधनपछि नेकपा एमालेले पटकपटक सरकारको नेतृत्व गरेको छ । अहिले पनि सरकारमा सहभागी छ । तर दुर्घटनाको कारण पत्ता लगाउन सकेको छैन ।

मदन भण्डारीकी धर्मपत्नी विद्यादेवी भण्डारी गणतन्त्र नेपालको पहिलो महिला राष्ट्रपति बन्नुहुँदासमेत यो विषय अनुसन्धान गर्नुपर्ने चर्चा भए पनि अनुसन्धान हुन सकेन । भण्डारी दुई कार्यकाल राष्ट्रपति बन्दा धेरैले यो विषयको अनुसन्धानका लागि पहल गर्नुपर्ने बताए पनि त्यो भएन ।

कार दुर्घटनाको जीवित प्रमाण मानिएका चालक अमर लामाकोसमेत हत्या भइसकेकाले यो दुर्घटना अझ रहस्यमय बनेको छ ।