धनगढी । सुदूरपश्चिम प्रदेशका मुख्यमन्त्री दीर्घबहादुर सोडारीले आज विश्वासको मत लिँदै हुनुहुन्छ । मुख्यमन्त्रीले विश्वासको मत लिने प्रयोजनका लागि आज प्रदेशसभाको बैठक बोलाइएको छ ।
गठबन्धनका तर्फबाट मुख्यमन्त्री बनेका सोडारीलाई नेकपा एमाले पनि विश्वासको मत दिने निर्णय गरेको छ । हिजो बसेको एमाले प्रदेश संसदीय दलको बैठकले विश्वासको मत दिने तर सरकारमा सहभागी नहुने निर्णय गरेको हो ।
एमालेले विश्वासको मतको पक्षमा मतदान गर्न आफ्ना सांसदलाई ह्विप पनि जारी गरेको छ ।
एमालेकै समर्थनमा वैशाख ६ गते मुख्यमन्त्री नियुक्त भएका एकीकृत समाजवादीका सोडारीले यसअघि वैशाख २१ र २२ गते विश्वासको मत लिने तयारी गरेका थिए । तर एमाले तयार नभएपछि तेस्रो पटक जेठ ३ गते विश्वासको मत लिन बैठक आह्वान गरिएको छ ।
५३ सदस्यीय सुदूरपश्चिम प्रदेशसभामा मुख्यमन्त्रीले विश्वासको मत प्राप्त गर्न २७ सदस्यको समर्थन चाहिन्छ । सोडारीको पक्षमा नेकपा माओवादी केन्द्रका १०, एमालेका १०, नागरिक उन्मुक्तिका २, स्वतन्त्र एक र एकीकृत समाजवादीका चार सांसदको समर्थन छ ।
