काठमाडौँ । प्रहरीले सहकारीको अर्बौं रकम घोटालामा फरार रहेका जिबी राईको राहदानी रोक्का गर्न राहदानी विभागमा पत्राचार गरेको छ ।
जिल्ला प्रहरी कार्यालय कास्कीले राईको राहदानी रोक्का गर्नका लागि आइतबार पत्र लेखेर विभागमा पठाएको हो ।
फरार रहेका राईको राहदानीलाई ‘कालोसूची’ मै राखिएको छ । राईविरूद्ध इन्टरपोलमार्फत् डिफ्युजन नोटिस जारी समेत भएको छ । तर, उनी अझै पक्राउ पर्न सकेका छैनन् ।
उनलाई पक्राउ गर्न कूटनीतिक तवरबाट पनि प्रयास भइरहेको सरकारको दाबी छ ।
प्रहरी प्रमुख आइजिपी बसन्त कुँवरले राई मलेसियामा रहेको बताएपछि उपप्रधान एवं गृहमन्त्री रवि लामिछानेले मलेसियाका गृहमन्त्रीसँग फोनमा राईबारे कुराकानी समेत गरेका थिए ।
सूर्यदर्शन बचत तथा ऋण सहकारी संस्थाका अध्यक्ष समेत रहेका उनी ग्यालेक्सी फोरके टिभीका सञ्चालक समेत थिए ।
