काठमाडौं । प्रधानमन्त्री पुष्पकमल दाहालले राष्ट्रपति रामचन्द्र पौडेलले सदनमा सार्वजनिक गर्ने सरकारको नीति तथा कार्यक्रमलाई सहयोग गर्न नेपाली कांग्रेसलाई आग्रह गर्नुभएको छ ।
प्रधानमन्त्री दाहालले आज कांग्रेसका नेताहरुलाई बालुवाटारमा बोलाएर राष्ट्रपतिले सम्बोधन गर्ने बेला सदनमा अवरोध नगर्न आग्रह गर्नुभएको हो । नेपाली कांग्रेसले सहकारी ठगी प्रकरणमा गृहमन्त्री रवि लामिछानेमाथि छानबिन गर्नुपर्ने माग गर्दै संसद् अबरुद्ध गर्दै आएको छ ।
प्रधानमन्त्री दाहालसँगको छलफलपछि नेपाली कांग्रेसका प्रमुख सचेतक रमेश लेखकले संसद् अवरुद्ध खुलाउने विषयमा छलफल केन्द्रित रहेको र प्रधानमन्त्रीले राष्ट्रपतिको सम्बोधनमा सहयोग गर्न आग्रह गरेको बताउनुभयो ।
प्रधानमन्त्री दाहालले समस्या समाधानका लागि प्रयास गरिरहेको बताउनुभएको छ । उहाँले नीति तथा कार्यक्रम राष्ट्रपतिबाट सम्बोधन हुने भएकाले अवरोध नगर्न भन्नुभएको हो । प्रधानमन्त्रीको भनाइबारे संसदीय दलको बैठकमा छलफल गरी निचोड निकाल्ने कांग्रेसले जनाएको छ ।
संसदीय दलको बैठकअघि प्रधानमन्त्रीसँग छलफलका लागि कांग्रेस महामन्त्री गगन थापा र प्रमुख सचेतक रमेश लेखक बालुवाटार पुग्नुभएको थियो ।
कांग्रेस संसदीय दलको बैठक पनि आज बिहान बस्दै छ । कांग्रेसले सहकारीको बचत अपचलनमा उपप्रधान एवं गृहमन्त्री रवि लामिछानेको संलग्नता रहेको भन्दै छानबिनका लागि संसदीय समिति गठनको माग गर्दै आएको छ । बैठकमा आज सदनमा कसरी प्रस्तुत हुने भन्ने विषयमा छलफल हुने बताइएको छ ।
