काठमाडौं । संघीय संसद्को बजेट अधिवेशन सुरु भएको पहिलो दिन नै सुशासनको विषयलाई लिएर संसद् तात्यो । सहकारीको बचत हिनामिना गरेको मुद्दा संसद्मा चर्कियो । गृहमन्त्री रवि लामिछानेमाथि नै छानबिन गर्न संसदीय समिति गठन गर्नुपर्ने माग गर्दै प्रमुख प्रतिपक्षी दल नेपाली कांग्रेसले सदन अबरुद्ध गर्यो ।
सदनमा नाराबाजी भइरहँदा केही रोचक दृष्य देखिए । विशेष अदालतबाट भ्रष्टाचारी ठहर भएका नेपाली कांग्रेसका सांसद टेकबहादुरु गुरुङ पनि बैठक उपस्थित भएर नाराबाजी गर्न थाले । विशेष अदालतबाट भृकुटीमण्डपको जग्गा भाडा प्रकरणमा भ्रष्टाचारी ठहर भएका पूर्वमन्त्री एवम् नेपाली कांग्रेसका सांसद टेकबहादुर गुरूङ पहिलो पटक बैठकमा सहभागी भएका हुन् ।
कांग्रेसका सांसदहरु रोस्ट्रमै पुगेर नाराबाजी गर्न थालेपछि गुरुङ पनि सँगै पुगेर नाराबाजी गरे । उनले बैठकमा सहकारी ठगलाई कारबाहीको मागसमेत गरे । यो दृश्य हेरिरहेका अन्य सांसदहरु भने मुखामुख गर्दै थिए ।
शपथ ग्रहणलगत्तै भ्रष्टाचार निवारण ऐनअनुसार निलम्बनमा परेका सांसद गुरूङ एउटा पनि बैठकमा सहभागी हुन पाएका थिएनन् । तर सर्वोच्चले उनको निलम्बनलाई खारेज गरिदिएपछि उनी बैठकमा सहभागी भएका हुन् । पहिलो दिनको बैठक मै उनले सुशासनको पक्षमा नाराबाजी गर्न भ्याए । जबकी उनी आफैं विशेष अदालतबाट भ्रष्टाचारी ठहर भइसकेका व्यक्ति हुन् ।
विशेष अदालतबाट भ्रष्टाचारी ठहर भएका गुरूङको मुद्दा सर्वोच्च अदालतमा विचाराधीन छ ।
संसदको अधिवेशनको पहिलो दिन नेकपा एमालेका सुहाङ नेम्वाङ र जनता समाजवादी पार्टीकी हसिना खान पहिलो पटक बैठकमा पुगे ।
पूर्वसभामुख समेत रहेका बुवा सुवास नेम्वाङको निधन भएपछि इलाम–२ बाट सुहाङ निर्वाचित भएका हुन् । त्यस्तै जनता समाजवादी पार्टीकी सांसद हसिना खान पनि पहिलो पटक बैठकमा सहभागी भइन् ।
