काठमाडौं । सत्तारुढ राष्ट्रिय स्वतन्त्र पार्टी (रास्वपा) को सचिवालयको बैठक आज बस्दै छ । पार्टी कार्यालयम च:मतिमा अपराह्न साढे चार बजे बैठक बस्ने तय भएको छ ।
राष्ट्रिय स्वतन्त्र पार्टीले उपनिर्वाचनको समीक्षा गर्न आज सचिवालय बैठक बोलाएको हो । इलाम प्रतिनिधिसभा क्षेत्र नं. २ मा भएको उपनिर्वाचनमा रास्वपा चौथो भएको थियो ।
इलाम २ मा नेकपा एमालेका सुहाङ नेम्वाङ २७ हजार ७७२ मत ल्याएर निर्वाचित हुँदा रास्वपा मिलन योङहाङ लिम्बूले ५ हजार ५० मत मात्र पाएका थिए ।
रास्वपाको आजको बैठकमा समसामयिक राजनीतिक परिस्थिति र आगामी कार्ययोजनाबारे छलफल हुने बताइएको छ ।
संसद्को बर्खे अधिवेशन यही वैशाख २८ गते आह्वान भएको छ । यसअघि प्रमुख प्रतिपक्षी दल नेपाली कांग्रेसले सहकारी ठगीमा पार्टी सभापति रहेका उपप्रधान तथा गृहमन्त्री रवि लामिछानेको संलग्ना देखिएको भन्दै संसदीय छानबिन समिति बनाउन माग गरेको थियो । उसले संसद् अवरोधसमेत गरेको थियो ।
संसद्को आउँदो अधिवेशनमा पनि कांग्रेसले यही माग राख्न तयारी गरेको छ । रास्वपाको बैठकमा यसबारे पनि छलफल हुनेछ ।
बजेट अधिवेशनलाई प्रभावकारी बनाउन रास्वपाले यही वैशाख २६ गते संसदीय दलको बैठक पनि बोलाएको छ ।
