काठमाडौँ । आईपीएल–२०२४ को ४९ औं खेलमा पञ्जाब किंग्सले चेन्नई सुपर किंग्सलाई ७ विकेटले पराजित गरेको छ । यस लिगमा चेन्नईमाथि पञ्जाबको यो लगातार पाँचौं जित हो ।
टोलीले चालू सिजनमा पहिलो पटक लगातार दोस्रो खेल जितेको हो । यो जितसँगै पञ्जाबले प्लेअफमा पुग्ने सम्भावना कायमै राखेको छ । टोली २ अंक जोडेर सातौं स्थानमा पुगेको छ । ४ जितपछि पञ्जाबको ८ अंक छ ।
चेन्नईको एमए चिदम्बरम स्टेडियममा बुधबार भएको खेलमा पञ्जाबले टस जितेर बलिङ रोजेको थियो । चेन्नईले २० ओभरमा ७ विकेट गुमाएर १६२ रन बनाएको थियो । जवाफमा पञ्जाबले १७.५ ओभरमा ३ विकेटको क्षतिमा लक्ष्य पूरा गर्यो । खेलको प्लेयर अफ द म्याच हरप्रीत ब्रार भए । उनले १७ रन दिएर २ विकेट लिए ।
सीएसकेका कप्तान रुतुराज गायकवाडले ४८ बलमा ६२ रन बनाए । उनले सिजनमा चौथो अर्धशतक बनाए । गायकवाडका अलावा अजिंक्य रहाणेले २९ रन र समीर रिजवीले २१ रनको योगदान दिए । पञ्जाबका हरप्रित ब्रार र राहुल चाहरले २–२ विकेट लिए । कागिसो रबाडा र अर्शदीप सिंहले एक–एक विकेट लिए ।
पीबीकेएसका ओपनर जोनी बेयरस्टोले ४६ रन र रिले रुसोले ४३ रनको महत्वपूर्ण इनिङ्स खेले । कप्तान साम करन २६ र शशांक सिंह २५ रनमा अविजित रहे । चेन्नईका शार्दुल ठाकुर, रिचर्ड ग्लिसन र शिवम दुबेले एक–एक विकेट लिए ।
