काठमाडौं । नेकपा एमालेका अध्यक्ष केपी शर्मा ओली विजयोत्सवमा सहभागी हुन आज इलाम जाँदै हुनुहुन्छ ।
इलाम क्षेत्र २ मा सम्पन्न प्रतिनिधिसभा उपनिर्वाचनमा एमाले उम्मेदवार सुहाङ नेम्बाङ विजयी हुनुभएपछि विजय उत्सव समारोहलाई सम्बोधन गर्न ओली इलाम जान लाग्नुभएको हो ।
ओलीले दिउँसो १ बजे इलाम चोकबजारमा सम्बोधन गर्ने कार्यक्रम छ । विजयी भएका नेम्वाङलाई शुभकामना दिन भेटघाट कार्यक्रम भने ११ बजेबाट राखिएको छ ।
आज विहान सम्पन्न मतगणनामा कांग्रेस उम्मेद्वार डम्बरबहादुर खड्कालाई ५ हजार ८ सय ३० मतान्तरले पछि पार्दै सुहाङ विजयी हुनुभएको थियो । उहाँले २७ हजार ७७२ मत प्राप्त गर्दा कांग्रेस उम्मेद्वार खड्काले २१ हजार ९४२ मत ल्याउनुभयो ।
पहिचान पक्षधर स्वतन्त्र उम्मेदवार डकेन्द्रसिंह थेगिम ११ हजार ४५७ मतसहित तेस्रो हुनुभएको छ भने रास्वपा उम्मेदवार मिलन लिम्बू ५ हजार ५० मतसहित चौथो हुनुभएको छ ।
