काठमाडौँ । कप्तान ऋषभ पन्त र अक्षर पटेलको अर्धशतकको मद्दतमा दिल्ली क्यापिटल्सले गुजरात टाइटन्सलाई दोस्रो पटक पराजित गरेको छ।
टोलीले चालु सिजनको ४० औं खेलमा टाइटन्सलाई ४ रनले पराजित गरेको हो । दिल्लीको यो सिजनमा चौथो जित हो । यो जितसँगै दिल्ली ८ अंकसहित अंक तालिकाको छैटौं स्थानमा पुगेको छ ।
अरुण जेटली स्टेडियममा बुधबार भएको खेलमा गुजरातले टस जितेर बलिङ रोजेको थियो । दिल्लीले २० ओभरमा ४ विकेट गुमाएर २२५ रन बनायो । गुजरातले निर्धारित २० ओभरमा ८ विकेट गुमाएर २२० रन मात्रै बनाउन सक्यो । खेलको प्लेयर अफ द म्याच ऋषभ पन्त भए । पन्तले ४३ बलमा ८८ रनको इनिङ खेले । यति मात्र होइन, उनले दुईवटा क्याच पनि लिए ।
जवाफी इनिङ्समा जीटीका डेभिड मिलर (५५ रन) र साई सुदर्शन (६५ रन)ले अर्धशतक बनाएका थिए । मिलरले २० बलमा आफ्नो अर्धशतक पूरा गरे। ओपनर ऋद्धिमान साहाले ३९ रनको योगदान दिए भने राशिद खान २१ रन बनाएर अविजित फर्किए ।
दिल्लीका रसिख सलामले ३ विकेट लिए भने कुलदीप यादवले २ विकेट लिए । एनरिके नोर्त्या, मुकेश कुमार र अक्षर पटेलले एक–एक विकेट लिए ।
