काठमाडौँ । टी–२० सिरिज खेल्न वेस्ट इन्डिज ‘ए’ टोली नेपाल आइपुगेको छ । नेपालसँगको ५ खेलको टी–२० सिरिज खेल्न वेस्ट इन्डिज ‘ए’ टोली बुधवार बिहान नेपाल आइपुगेको हो ।
यसैबीच खेलाडीहरुको स्वागतलाई लिएर सामाजिक सञ्जालमा नेपाल क्रिकेट संघ (क्यान)को आलोचना भइरहेको छ ।
खेलाडीहरुको क्रिकेट किट तथा लगेजहरुको व्यवस्थापन गर्ने बेलामा बोलेरो जिपमा लगिएको भिडियो तथा तस्बिरहरु सामाजिक सञ्जालमा भाइरल भएका छन् । यसैलाई लिएर क्यानको व्यवस्थापन पक्षमाथि प्रश्न समेत उठाइएको छ ।
सामाजिक सञ्जालमा क्यानको तिब्र आलोचना भइरहेको छ । प्रयोगकर्ताहरुले खेलकुदमन्त्री विराजभक्त श्रेष्ठमाथि पनि प्रश्न उठाइरहेका छन् ।
वेष्ट इण्डिज ‘ए’ र नेपालबीचको पहिलो खेल टीयु क्रिकेट मैदानमा वैशाख १५ गते हुनेछ । वैशाख १६ मा दोस्रो, १९ मा तेस्रो, २० मा चौथो र वैशाख २२ मा अन्तिम खेल हुनेछ ।
नेपालसँग खेल्न पहिलो पटक वेस्ट इन्डिज टोली नेपाल आएको हो । टोलीमा अनुभवी खेलाडी रोस्टन चेसको कप्तानीमा १५ सदस्यीय बलियो टोली छन् ।
