काठमाडौं । बोलेरो गाडी र मोटरसाइकल आपसमा जुध्दा झापामा तीन जनाको मृत्यु भएको छ ।
पूर्व–पश्चिम राजमार्गअन्तर्गत शिवसताक्षी नगरपालिका ८ मा भएको दुर्घटनामा मोटरसाइकलमा सवार तीन जनाको मृत्यु भएको हो ।
पश्चिमबाट पूर्वतर्फ जाँदै गरेको मे ३ प ५००१ नम्बरको मोटरसाइकल र विपरीत दिशाबाट आउँदै गरेको प्र १–०१–००१ च ९३२९ नम्बरको गाडी एक आपसमा जुध्दा तीनको मृत्यु भएको जिल्ला प्रहरी कार्यालय झापाले जनाएको छ ।
दुर्घटनामा गम्भीर घाइते उनीहरुलाई उपचारका लागि विर्तामोडको विएण्डसी अस्पताल पुर्याएपछि चिकित्सकले मृत घोषणा गरेको हो ।
प्रहरीले मृतकका आफन्तहरु अस्पताल पुगिसकेको र सनाखतको काम भइरहेको जनाएको छ ।
