एजेन्सी । पाकिस्तानका विकेटकिपर/ब्याट्सम्यान मोहम्मद रिजवानले शनिबार न्यूजिल्याण्डविरुद्धको दोस्रो टी–२० अन्तर्राष्ट्रिय खेलमा विश्व कीर्तिमान बनाएका छन् । मोहम्मद रिजवान टी–२० अन्तर्राष्ट्रिय क्रिकेटमा सबैभन्दा छिटो ३ हजार रन बनाउने ब्याट्सम्यान बनेका छन् ।
३१ वर्षीय रिजवानले रावलपिण्डीमा भएको दोस्रो टी–२० अन्तर्राष्ट्रिय खेलमा ३४ बलमा चार चौका र एक छक्काको मद्दतले अविजित ४५ रनको खेल जित्ने इनिङ्स खेलेका थिए ।
पाकिस्तानले दोस्रो टी–२० अन्तर्राष्ट्रिय खेलमा न्युजिल्याण्डलाई ७ विकेटले पराजित गर्दै पाँच खेलको टी–२० अन्तर्राष्ट्रिय सिरिजमा १–० को अग्रता बनाएको छ ।
मोहम्मद रिजवानले आफ्नो टी–२० अन्तर्राष्ट्रिय करियरको ७९ औं इनिङमा तीन हजार रन पुरा गरेका छन् । उनले पाकिस्तानकै बाबर आजम र विराट कोहलीलाई दुई इनिङ्सको अन्तरले पछि पार्दै कीर्तिमान बनाएका हुन् । बाबर र विराट दुवैले ८१ औं इनिङ्समा तीन हजार रनको आँकडा पार गरेका थिए ।
