काठमाडौं । बुधबार शेयर बजार सामान्य करेक्सन भएर १८.७६ अंकले उकालो लागेको छ । यस दिन बजार २ हजार ४४१.८५ विन्दुमा पुगेर बन्द भएको छ ।
सेन्सेटिभ इन्डेक्स शून्य दशमलव ८६ अंकले घटेर ४४६ दशमलव ३८ विन्दुमा झरेको छ । मंगलबार रू. ८ अर्ब २७ करेड ९६ लाख ४ हजार बरावरको शेयर खरीदविक्री भएको थियो । बुधबारको कारेबारको दिन रू. ८ अर्ब ६ करोड २ लाख ३८ हजार बराबरको शेयर कारोबार भएको हो । मंगलबारको तुलनामा भने कारोबार रकम घटेको हो ।
यस दिनको कारोबार २०८ ओटा कम्पनीको ५९ हजार १५१ पटकको व्यापारमा भएको हो । उक्त रकम बराबरको १ करोड ५२ लाख ८९ हजार २५९ कित्ता शेयर कारोबार भएको छ ।
आरम्भ चौतारी लघुवित्तको ९ दशमलव ९८ प्रतिशत, गुराँस लघुवित्तको ९ दशमलव ९७ प्रतिशत, सपोर्ट माइक्रोफाइनान्सको ९ दशमलव ९६ प्रतिशत ,प्रभ लाइफको ९ दशमलव ९१ प्रतिशत, नेशनल हाइड्रोपावरको ९ दशमलव ८५ प्रतिशत र एभरेष्ट इन्स्योरेन्सको संस्थापक शेयरको मूल्य ९ दशमलव ८२ प्रतिशतले बढेको हो । दोहोरो अंकले बढेको बजारमा पोखरा फाइनान्सको शेयरमूल्य सर्वाधिक ७ दशमलव शून्य ५ प्रतिशतले घटेको छ । पोखरा फाइनान्सको शेयरमूल्य प्रतिकित्ता रू. २१ ले घटेर रू. २७७ मा झरेको हो ।
यो जीवन बीमा समूहको परिसूचक सर्वाधिक ६ दशमलव २५ प्रतिशत बढेको छ । त्यस्तै निर्जीवन बीमा समूहको ३ दशमलव ९८ प्रतिशत, व्यापारिक समूहको १ दशमलव १४ प्रतिशत, लघुवित्तको १ दशमलव ६९ प्रतिशत र म्युचुअल फण्डको शून्य दशमलव २७ प्रतिशत बढेको छ ।
यस दिन होटल समूहका लगानीकर्ताहरुले सर्वाधिक गुमाएका छन् । होटल समूहको परिसूचक सर्वाधिक १ दशमलव १८ प्रतिशतले घटेको हो । त्यस्तै बैंकिङ समूहको शून्य दशमलव ५७ प्रतिशत, वित्तको र उत्पादन तथा प्रशोधनको शून्य दशमलव ५७ प्रतिशत, विकास बैंकको शून्य दशमलव २५ प्रतिशत, जलविद्युतको शून्य दशमलव २१ प्रतिशत र अन्यको शून्य दशमलव ११ प्रतिशत परिसूचक घटेको छ ।
बुधबार नेपाल लाइफ इन्स्योरेन्सले सर्वाधिक रकमको कारोबार ओगटेको छ । यो दिन कम्पनीले ५१ प्रतिशत लाभांश प्रयोजनका लागि बुक क्लोज गरेको छ । लाभांश पछि पनि नेपाल लाइफको शेयरप्रति लगानीकर्ताको आकर्षण बढी देखिएको छ ।
कम्पनीको रू. ९३ करोड ३४ लाख २३ हजार बराबरको शेयर कारोबार भएको हो भने ९ दशमलव ९९ प्रतिशतले शेयरमूल्य बढेको हो । कम्पनीको शेयरमूल्य प्रतिकित्ता रू. २१९ ले बढेर अन्तिम मूल्य रू. २ हजार ४११ पुगेको छ । नेपाल लाइफसँगै यस दिन अन्य ६ ओटा कम्पनीको शेयरमूल्य ९ प्रतिशतभन्दा बढीले बृद्धि भएको छ ।
