एजेन्सी । आईपीएल हरेक दिन थप रोमाञ्चक बन्दै गइरहेको छ । प्रतियोगिताको ३४औँ खेल चेन्नई सुपर किंग्स र लखनउ सुपर जाइन्ट्सबीच एकना स्टेडियममा भएको थियो ।
घरेलु मैदानमा भएको उक्त खेलमा लखनउले चेन्नईलाई ८ विकेटले पराजित गर्यो । तर यस खेलमा दुवै टोलीका कप्तानले गल्तीका कारण ठूलो जरिवाना तिर्नुपरेको छ । लखनउका कप्तान केएल राहुल र चेन्नईका कप्तान ऋतुराज गायकवाडलाई जरिवाना लगाइएको हो ।
भारतीय क्रिकेट कन्ट्रोल बोर्ड (बीसीसीआई)ले राहुल र ऋतुराजलाई स्लो ओभर रेटका कारण जरिवाना गरेको हो । आईपीएल आचार संहिता अन्तर्गत राहुल र गायकवाडको यो पहिलो अपराध थियो, जसका कारण दुवैलाई १२–१२ लाख जरिवाना गरिएको थियो ।
कप्तानलाई जरिवाना गरिएको यो प्रतियोगिताको पहिलो खेल होइन । दिल्ली क्यापिटल्सका कप्तान ऋषभ पन्त, कोलकाता नाइट राइडर्सका कप्तान श्रेयस अय्यर र मुम्बई इन्डियन्सका कप्तान हार्दिक पाण्ड्या पनि यो जरिवानाको सिकार भएका छन् ।
