एजेन्सी । इन्डियन प्रिमियर लिग (आईपीएल) २०२४ को ३४ औं खेलमा लखनउ सुपर जाइन्ट्स (एलएसजी)ले चेन्नई सुपर किंग्स (सीएसके) को सामना गर्दैछ । खेल भारत रत्न श्री अटल बिहारी वाजपेयी क्रिकेट स्टेडियम (इकाना), लखनउमा साँझ ७ः४५ बजेबाट सुरु हुनेछ ।
लखनउको टोली यस सिजन ६ मध्ये ३ खेल जितेर अंक तालिकाको पाँचौं स्थानमा छ भने चेन्नई ६ मध्ये ४ खेल जितेर तेस्रो स्थानमा छ । आईपीएलमा हालसम्म लखनउ सुपर जायन्ट्स र चेन्नई सुपर किंग्सबीच ३ खेल खेलिएको छ । दुवै टोलीले १–१ खेल जितेका छन् भने एक खेल अनिर्णित रह्यो ।
केएल राहुलको कप्तानीमा रहेको लखनउको टोलीले यो सिजन राम्रो सुरुवात गर्न सकेन । टोलीले आफ्नो पहिलो खेलमा राजस्थान रोयल्ससँग हार बेहोरेको थियो । यसपछि टोलीले पुनरागमन गर्दै लगातार तीन खेल जित्यो ।
दोस्रो खेलमा पञ्जाब किंग्सलाई, तेस्रोमा रोयल च्यालेन्जर्स बैंग्लोरलाई र चौथोमा गुजरात टाइटन्सलाई हराएको थियो । तर, टोलीले पछिल्लो दुई खेलमा दिल्ली क्यापिटल्स र कोलकाता नाइट राइडर्ससँग हार बेहोरेको छ । टोलीका सर्वाधिक स्कोरर निकोलस पुरन ( ६ खेलमा २२३ रन) हुन् । बलिङमा यश ठाकुर ( ५ खेलमा ७ विकेट) शीर्ष स्थानमा छन् ।
यस सिजन चेन्नईले राम्रो सुरुवात गरेको थियो । टोलीले पहिलो दुई खेल लगातार जितेको थियो । पहिलो खेलमा रोयल च्यालेन्जर्स बैंग्लोर र दोस्रोमा गुजरात टाइटन्सलाई पराजित गरेको थियो । तर, तेस्रोमा दिल्ली क्यापिटल्ससँग र चौथोमा सनराइजर्स हैदरावादसँग पराजित भयो । टोलीले पछिल्ला दुवै खेल जितेको छ ।
पाँचौंमा कोलकाता नाइट राइडर्स र छैटौंमा मुम्बई इन्डियन्सलाई पराजित गरेको हो । टोलीका लागि शिवम दुबेले सर्वाधिक रन (६ खेलमा २४२ रन) बनाएका छन् । मुस्ताफिजुर रहमानले सर्वाधिक विकेट ( ५ खेलमा १० विकेट) लिएका छन् ।
लखनउको पिचमा आईपीएलमा स्पिनरहरुको दबदबा रहँदै आएको छ । कम स्कोरिङ खेलहरू यहाँ देखिएका छन् भने ब्याट्सम्यानहरूलाई रन बनाउन निकै गाह्रो हुन्छ । यहाँ हालसम्म कुल १० आईपीएल खेल खेलिएका छन् । यहाँको उच्चतम टोली स्कोर १९९/८ हो, जुन यस वर्ष पञ्जाब किंग्स विरुद्ध एलएसजीले बनाएको थियो । यहाँ पछिल्ला ६ खेलमा पहिलो इनिङ्समा ब्याटिङ गरेको टोलीले र ३ खेलमा पछ्याएको टोलीले जित निकालेको छ । जबकि एक खेल भने नतिजाविहीन रह्यो ।
शुक्रबार लखनउमा बादल लाग्ने भएपनि वर्षाको सम्भावना भने छैन । हावा पनि बलियो हुनेछ। यहाँको तापक्रम २५ देखि ३९ डिग्री सेल्सियसको बीचमा रहनेछ ।
