काठमाडौँ । इन्डियन प्रिमियर लिग (आईपीएल)२०२४ को ३३ औं खेलमा मुम्बई इन्डियन्स (एमआई)ले पञ्जाब किंग्स (पीबीकेएस)लाई ९ रनले हरायो ।
बिहीबार मुल्लानपुर (चण्डिगढ)मा भएको खेलमा पञ्जाबले टस जितेर बलिङ रोजेको थियो । टस हारेर पहिले ब्याटिङ गरेको मुम्बईले २० ओभरमा ७ विकेट गुमाएर १९२ रन बनाएको थियो । जवाफमा पञ्जाब किंग्स १९.१ ओभरमा १८३ रनमा अलआउट भयो ।
रोहित शर्माले आईपीएलमा २५० खेल पूरा गरेका छन् । रोहित शर्मा यो अंक पार गर्ने दोस्रो खेलाडी बनेका छन् । यो आँकडा पार गर्ने पहिलोमा चेन्नई सुपर किंग्सका पूर्व कप्तान महेन्द्र सिंह धोनी छन् । धोनीले २५६ आईपीएल खेल खेलेका छन् । आईपीएलको सबैभन्दा धेरै खेल खेलेका सबै खेलाडीहरू पहिलो सिजन अर्थात् २००८ देखि लिगमा सहभागी हुँदै आएका छन् ।
यस्तै, रोहितले मुम्बई इण्डियन्सका लागि सर्वाधिक छक्का प्रहार गरेका छन् । शर्माले एमआईका लागि खेलेका २०५ खेलमा कुल २२४ छक्का प्रहार गरेका छन् । उनले एमआईका लेजेन्ड किरोन पोलार्डलाई पछाडि छोडे। पोलार्डले टोलीका लागि कुल २२३ छक्का प्रहार गरेका छन् । सूर्यकुमार यादव एमआईका लागि १०० छक्का प्रहार गर्न २ छक्का टाढा छन् । उनले टोलीका लागि ९८ छक्का प्रहार गरेका छन् ।
