एजेन्सी । चेन्नई सुपर किंग्स (सिएसके)का पूर्व कप्तान महेन्द्र सिंह धोनीले अर्को आईपीएल पनि खेल्न सक्ने अनुमान गरिएको छ । जियो सिनेमाको एक कार्यक्रममा पूर्व क्रिकेटर सुरेश रैनाले यस्तो दाबी गरेका हुन् ।
१४ अप्रिलमा धोनीले मुम्बई इन्डियन्स विरुद्ध वानखेडे स्टेडियममा तीन छक्का प्रहार गरेका थिए । यस खेलपछि भएको छलफल कार्यक्रममा एन्करले धोनीको खेल्ने विषयमा प्रश्न उठाएका थिए ।
कार्यक्रममा उपस्थित पूर्व फास्ट बलर आरपी सिंहलाई एन्करले सबैभन्दा पहिले यो प्रश्न सोधे । यसबारे सिंहले भने – रैनाले यसको राम्रो जवाफ दिन सक्नेछन् ।
धोनी ४२ वर्षका भइसकेका छन् । उनले १५ अगस्ट २०२० मा अन्तर्राष्ट्रिय क्रिकेटबाट सन्यास लिए । सन् २०२३ देखि उनको सन्यासको बारेमा अड्कलबाजी भइरहेको छ ।
सन् २०२३ धोनीको अन्तिम वर्ष हुने अनुमान गरिएको थियो तर लखनउको एकना स्टेडियममा खेलिएको खेलमा टसपछि कमेन्टेटर ड्यानी मोरिसनले धोनीलाई सोधे कि तपाई आफ्नो अन्तिम सिजन रमाइलो गर्दै हुनुहुन्छ ? यसको जवाफमा धोनीले भनेका थिए ‘तिमीले निर्णय गरेका छौ यो मेरो अन्तिम आईपीएल हो भन्ने ।’ यसपछि धोनी हाँस्न थाले । मोरिसनले धोनीलाई अर्को वर्ष पनि खेल्ने बताएका छन् ।
आईपीएलको यो सिजन सुरु हुनुअघि चेन्नईको कप्तानी ऋतुराज गायवाडलाई सुम्पिएको थियो । यस्तो अवस्थामा यो धोनीको आईपीएलको अन्तिम वर्ष हुने अनुमान गरिएको छ ।
महेन्द्र सिंह धोनीले मुम्बई इन्डियन्स विरुद्धको खेलमा अन्तिम चार बलमा २० रन बनाएका थिए । उनले लगातार तीन बलमा छक्का र एक बलमा २ रन बनाए । दिल्ली क्यापिटल्सविरुद्धको खेलमा धोनीले १६ बलमा ४ चौका र ३ छक्का सहित ३७ रन बनाएका थिए । यस सिजनमा उनले चार खेलमा तल्लो क्रममा ब्याटिङ गर्ने मौका पाए र ५९ रन बनाए ।
