काठमाडौँ । इन्डियन प्रिमियर लिग (आईपीएल)मा बुधबार १७ औं सिजनको सबैभन्दा कम स्कोर बनेको थियो । गुजरात टाइटन्सले ८९ रन मात्र बनाउन सक्यो ।
आईपीएलमा यो टोलीको सबैभन्दा कम स्कोर हो । दिल्ली क्यापिटल्सले लक्ष्य ८ दशमलव ५ ओभरमा पूरा गर्यो, जुन धेरै बल बाँकी रहेको दिल्लीको सबैभन्दा ठूलो जित हो ।
दिल्लीका विकेटकिपर कप्तान ऋषभ पन्तले विकेट पछाडि ४ विकेट लिए ।
आईपीएल २०२४ को ३२औं खेलमा दिल्लीले गुजरातलाई ६ विकेटले पराजित गरेको हो । ९० रनको लक्ष्य पछ्याएको टोलीले ८.५ ओभरमा ४ विकेट गुमाएर पुरा गरेको थियो । ओपनर ज्याक फ्रेजर–मगार्कले १० बलमा २० रन, शाइ होपले १० बलमा १९ रन र कप्तान ऋषभ पन्तले १६ रन बनाए ।
अहमदाबादमा दिल्लीले टस जितेर बलिङ रोजेको थियो । गुजरात टाइटन्स १७.३ ओभरमा ८९ रनमा अलआउट भयो । डिसीका मुकेश कुमारले ३, इशान्त शर्मा र ट्रिस्टन स्टब्सले २–२ विकेट लिए । अक्षर पटेल र खलिल अहमदले १–१ विकेट लिए भने एक ब्याट्सम्यान रनआउट भए ।
गुजरातका रासिद खानले ३१ रन बनाए भने अन्य कुनै ब्याट्सम्यानले १५ रनको अंक पनि पार गर्न सकेनन् । साई सुदर्शनले १२ रन र राहुल तेवाटियाले १० रन बनाए ।
