काठमाडौँ । नेपालका अलराउन्डर दीपेन्द्रसिंह ऐरीले आईसीसी टी–२० वरियतामा छलाङ मारेका छन् । उनी अलराउन्डरतर्फ ११औँ स्थानमा उक्लिएका छन् । यसअघि २५ औँ स्थानमा रहेका उनले एकैपटक १४ स्थानमाथि आइपुगेका हुन् ।
दिपेन्द्रले ओमानमा जारी एसिसी प्रीमियर कपमा कतारविरुद्ध एकै ओभरमा ६ छक्का प्रहार गरेका थिए । यस्तै टी–२० ब्याट्सम्यानको वरियतातर्फ दीपेन्द्र ६२ औँ स्थानमा छन् । उनी १६ स्थान माथि उक्लिएका हुन् ।
ब्याट्सम्यानको नयाँ वरियतामा नेपाली टोलीका कप्तान रोहितकुमार पौडेल ५३औँ स्थानमा रहँदा आसिफ शेखले ३६ स्थान सुधार गर्दै ७५औँ स्थानमा उक्लेका छन् । त्यस्तै कुशल मल्ल नौ स्थान सुधार गर्दै १००औँ स्थानमा पुगेका छन् ।
