काठमाडौं । सरकारले संघीय संसद्को हिउँदे अधिवेशन अन्त्य गर्न सिफारिस गरे पनि आज प्रतिनिधिसभाको बैठक बस्दै छ । सरकारले आजै मध्यराति १२ बजेदेखि लागू हुने गरी संघीय संसद्को अधिवेशन अन्त्य गर्न राष्ट्रपति रामचद्र पौडेलसमक्ष सिफारिस गरिसकेको छ ।
शुक्रबार बसेको मन्त्रिपरिषद् बैठकले संसदको हिउँदे अधिवेशन वैशाख २ गते राति १२ बजेदेखि अन्त्य गर्न सिफारिस गरेको थियो । तर यसअघि नै प्रतिनिधिसभाको बैठक आजका लागि तय गरिएको हो । सरकारले अधिवेशन अन्त्यको सिफारिस गरेपछि आज बैठक बस्छ कि बस्दैन भन्ने अन्योल चाहिँ कायमै छ ।
राष्ट्रपतिले अधिवेशन अन्त्य गरेको पत्र संसद्लाई जानकारी दिनुपर्ने छ । बीचमै अधिवेशन अन्त्य भए त्यस्तो जानकारी सूचना टाँस गरेर पनि दिन सकिने छ । तर आज बैठक बस्ने र त्यसपछि मात्र पत्रबारे सदनलाई जानकारी दिने तयारी संसद् सचिवालयको छ ।
नेपाली कांग्रेसले चैत २ गतेदेखि सदनमा लगातार अवरोध सिर्जना गर्दै आएको छ । आजको बैठक बसेमा पनि कांग्रेसले सरकारको विरोध गर्ने र आफ्ना माग पूरा गर्न दबाब दिने तयारी गरेको छ ।
कांग्रेसले सहकारी ठगी प्रकरणमा गृहमन्त्री रवि लामिछानेको संलग्नताको आरोप लगाउँदै छानबिन गर्न संसदीय समिति गठनको माग गर्दै आएको छ । तर सरकारले त्यसको वास्ता गरेको मात्र छैन, समिति गठन गर्न नसकिने जवाफ नै दिएको छ ।
