• ३० चैत्र २०८०, शुक्रबार
  •      Fri Apr 12 2024
  •   Unicode
Logo

आयरल्यान्ड ‘ए’ सँग नेपाल ‘ए’ २१ रनले पराजित



काठमाडौँ । पहिलो एकदिवसीय खेलमा आयरल्यान्ड ‘ए’ले नेपाल ‘ए’ लाई पराजित गरेको छ । कीर्तिपुरस्थित टियु मैदानमा भर्खरै सम्पन्न खेलमा नेपाल २१ रनले पराजित भएको हो । १५७ रनको सामान्य लक्ष्य पछ्याएको नेपाल २५.३ ओभरमा १३६ रनमै अलआउट हुन पुग्यो ।

नेपालका लागि शाहव आलमले ३७, देव खनालले २६, बसिर अहमदले २० रन जोड्दा रिजन ढकाल १२ रनमा नटआउट रहे । अन्य ब्याट्सम्यानले दोहोरो अंकमा रन बनाउन सकेनन् ।

अन्तिममा क्रिजमा रहेका मौसम ढकाल र रिजनबीच रन लिने क्रममा तालमेल नमिल्दा नेपालले हार बेहोर्न पुग्यो ।  मौसम रनआउट हुन पुग्दा नेपालले खेल गुमायो । बलिङतर्फ आयरल्यान्डका म्याथ्यु हम्फ्रेसले ५ तथा लियाम म्याककार्थीले ४ विकेट लिए ।

त्यसअघि टस जितेर पहिले ब्याटिङ गरेको आयरल्यान्ड ‘ए’ ३८ दशमलव तीन ओभरमा अलआउट हुँदा एक सय ५७ रन जोडेको थियो ।

आयरल्यान्ड ‘ए’का लागि केड कार्माइकलले अर्धशतकीय पारी खेले । उनले ७७ बलमा चार चौकाको सहयोगमा ५१ रन बनाए । कप्तान निल रकले ३२ बल खेल्ने क्रममा तीन छक्का र दुई चौकाको सहयोगमा ३९ रन बनाए ।

त्यसबाहेक पिटर मुरले २१ रन बनाउँदा ओपनरद्वर जेम्स मकलम र स्टेफल डोहनीले समान १२–१२ रनको योगदान दिए ।  नेपाल ‘ए’का लागि कमल ऐरीले ह्याट्रिकसहित चार विकेट लिए भने साहब आलम र मौसम ढकालले दुई/दुई विकेट लिए । साथै रिजन ढकालले एक विकेट लिए ।