काठमाडौँ । इन्डियन प्रिमियर लिग–२०२४ (आईपीएल) को १० औं खेलमा कोलकाता नाइट राइडर्स (केकेआर)ले रोयल च्यालेन्जर्स बैंगलोर (आरसीबी) लाई ७ विकेटले पराजित गरेको छ ।
कोलकाताको यो लगातार दोस्रो जित हो भने बैंगलोरले दोस्रो खेलमा हार बेहोरेको छ ।
बैंगलोरको एम चिन्नास्वामी स्टेडियममा शुक्रबार भएको खेलमा कोलकाताले १६.५ ओभरमा ३ विकेट गुमाएर १८३ रनको लक्ष्य पुरा गरेको हो । श्रेयस अय्यर ३९ रन बनाएर अविजित फर्किए भने रिंकु सिंह ५ रन बनाएर अविजित फर्किए ।
वेंकटेश अय्यरले ५० रनको आक्रामक पारी खेले, सुनिल नारायणले ४७ रन र फिल साल्टले ३० रन जोडे । आरसीबीका यश दयाल, मयंक डागर र विजयकुमार वैशाखले एक–एक विकेट लिए ।
टस जितेर पहिले ब्याटिङ गरेको आरसीबीले २० ओभरमा ६ विकेट गुमाएर १८२ रन बनाएको थियो । विराट कोहलीले ५९ बलमा ८३ रनको इनिङ खेले । उनले ४ चौका र ४ छक्का प्रहार गरे । कोहलीले लिगमा ५२औँ अर्धशतक बनाएका छन् ।
क्यामरुन ग्रीनले ३३ र ग्लेन म्याक्सवेलले २८ रनको योगदान दिए । कोलकाताका आन्द्रे रसेल र हर्षित रानाले २–२ विकेट लिए । खेलको प्लेयर अफ द म्याच सुनिल नारायण भए । उनले २२ बलमा ४७ रनको उत्कृष्ट इनिङ खेलेका थिए भने एक विकेट पनि लिएका थिए ।
आजको खेलः लखनउ सुपर जायन्ट्स भर्सेस पञ्जाव किंग्स – साँझ ७ः४५ बजे
