लन्डन । आइतबार इंग्लिस प्रिमियर लिगको उपाधि होडमा म्यानचेस्टर सिटीले निर्णायक साबित हुन सक्ने यात्रा तय गरेको छ । सिटीले डिफेन्डिङ च्याम्पियन लिरभपुललाई एनफिल्डमै ४–१ ले हरायो । सिटीले लिभरपुललाई उसको घरमा हराएको यो सन् २००३ यता पहिलो हो । सिटीको जितमा इलकयी गुन्डोगनले दुई तथा रहिम स्टर्लिङ र फिल फोडेनले एक–एक गोल गरे ।
लिभरपुलका तर्फबाट मोहम्मद सलाहले एक गोल फर्काए । सिटीको २२ खेलबाट ५० अंक भएको छ । टोली शीर्ष स्थानमा एक खेल कम खेलेर पाँच अंकको अग्रता लिन सफल रह्यो ।
लिभरपुल भने ४० अंकसाथ चौथो स्थानमा छ । चेल्सी ३९ अंकसाथ पाँचौं स्थानमा उक्लेको छ । यसका लागि उसले सेफिल्ड युनाइटेडलाई २–१ ले हरायो । यस्तै उल्भ्स र लेस्टरले गोलरहित बराबरी खेले । लेस्टर ४३ अंकमा तेस्रो स्थानमा छ ।
