एजेन्सी । इन्डियन प्रिमियर लिग (आईपीएल) का पछिल्ला केही सिजनको कुरा गर्ने हो भने खेलाडीहरु लगातार चोटको सिकार भइरहेका छन् । जसप्रित बुमराह, ऋषभ पन्त र प्रसिद्ध कृष्ण लगायत यी बाहेक धेरै विदेशी खेलाडी चोटका कारण आईपीएल २०२३ मा खेल्न सकेनन् ।
आईपीएल २०२४ मार्च २२ बाट सुरु हुँदैछ तर सिजन सुरु हुनुअघि नै चोटका कारण धेरै ठूला खेलाडी प्रतियोगिताबाट बाहिरिएका छन् । यीमध्ये धेरै खेलाडीको लिलामीमा करोडौंको बोली लागेको थियो । खेलाडी घाइते भएर पूरै प्रतियोगिताबाट बाहिरिएपछि पनि उनीहरुलाई पुरै पैसा दिइने कि नदिने प्रश्न उठ्ने निश्चित छ ।
यदि प्रतियोगिताबाट बाहिर भए भने पूरा पैसा पाइन्छ ?
आईपीएल नियम अनुसार यदि कुनै खेलाडीले सिजन सुरु हुनु अघि चोट वा अन्य कुनै कारणले आफ्नो नाम फिर्ता लिए भने उसलाई कुनै रकम दिइने छैन ।
यसको मतलब यदि कुनै खेलाडीले कुनै पनि खेल नखेलेर प्रतियोगिताबाट फिर्ता भएमा उसले पैसा पाउने छैन । त्यसैगरी प्रतियोगिताको क्रममा खेलाडी घाइते भएमा वा व्यक्तिगत कारणले खेल्न नसकेमा खेलको अनुपातका आधारमा रकम दिइनेछ ।
आईपीएल २०२४ बाट कति खेलाडी बाहिरिए ?
विश्वका धेरै शीर्ष खेलाडीले आईपीएल २०२४ गुमाउने भएका छन् । जसमा गत वर्ष २८ विकेट लिएर पर्पल क्याप जितेका मोहम्मद शामीको नाम पनि समावेश छ । उनीबाहेक लुंगी एनगिडी, गुस एट्किन्सन, जेसन रोय, प्रसिद्ध कृष्ण, मथिश पाथिराना, मार्क वुड, रोबिन मिन्जे र दिलशान मधुशंका पनि चोट र अन्य कारणले आईपीएल २०२४ बाट पूर्ण रुपमा बाहिर छन् । यसको मतलब आईपीएलको आगामी सिजनमा यी मध्ये कुनै पनि खेलाडीलाई कुनै पनि रकम दिइने छैन ।
