मिलान । शनिबार इटालीको सिरी ‘ए’ मा भएको खेलमा एसी मिलान र युभेन्टस दुवै पराजित भएका छन् । शीर्ष स्थानमा रहेको मिलानलाई स्पेजियाले २–० ले पराजित गरेको हो । सन् २०१० सम्म चौथो डिभिजनमा खेलिरहेको स्पेजिया यसै सिजन सिरी ‘ए’ मा उक्लेको हो । यसका लागि गुजियो मागोरे र सिमोन बास्टोनीले गोल गरे ।
यसपल्ट मिलान लिगमा पराजित भएको यो तेस्रो खेल मात्र हो । अब छिमेकी इन्टर मिलानसँग शीर्ष स्थान कब्जा गर्ने अवसर हुनेछ । मिलानको ४९ अंक छ भने इन्टर एक खेल कम खेलेर ४७ अंकमा छ ।
युभेन्टस भने नेपोलीबाट १–० ले पराजित रह्यो । डिफेन्डिङ च्याम्पियन युभेन्टस ४२ अंकसाथ तेस्रो स्थानमा रहेको छ ।
