लन्डन । चेल्सीले इंग्लिस प्रिमियर लिगमा सोमबार न्युकासल युनाइटेडलाई २–० ले हराएको छ । टिमो वार्नरले एक गोल गर्दै सहयोगी भूमिका खेलेपछि चेल्सीले जित निकालेको हो । यससँगै टोली अंक–तालिकाको चौथो स्थान उक्लिन सफल रह्यो ।
वार्नरले १४ खेलमा गर्न नसकेको गोलको खडेरी पनि तोडे । उनकै सहयोगमा ओलिभर जिरोडले गोलको खाता खोलेका थिए । यो जितपछि चेल्सीको २४ खेलबाट ४२ अंक भएको छ ।
समान ४२ अंकसाथ वेस्ट ह्याम पाँचौं स्थानमा छ भने डिफेन्डिङ च्याम्पियन लिभरपुल ४० अंकसहित छैटौं स्थानमा झरेको छ । पराजित न्युकासल भने २५ अंकसाथ १७ औं स्थानमा छ ।
