काठमाडौँ । आईसीसी पुरुष क्रिकेट विश्वकप लिग–२ को त्रिकोणात्मक शृङ्खला अन्तर्गत नेपाल नामिबियासँग पराजित भएको छ । कीर्तिपुरस्थित टियु मैदानमा भर्खरै सम्पन्न खेलमा नामिबियाले नेपाललाई दुई विकेटले हराएको हो ।
नेपालले दिएको १६९ रनको लक्ष्य नामिबियाले ४० ओभरमा ८ विकेट गुमाएर भेट्टायो ।
नामिबियाको जितमा कप्तान जेरहार्ड इरासमसले अर्धशतकीय इनिङ्स खेले । उनले ५६ बलमा ५२ रनको योगदान दिए । माइकल भान लिंगेनले ३१, रुवेन ट्रम्पेलमनले १६ रन जोड्दा यस्तै जेजे स्मिथ ३४ रनमा अविजित रहे ।
बलिङतर्फ नेपालका कुशल भुर्तेलले तीन तथा दिपेन्द्र सिंह ऐरी, कुशल मल्ल, रोहित पौडेल र ललित राजवंशीले एक–एक विकेट लिए ।
त्यसअघि टस हारेर ब्याटिङ थालेको नेपाल ३७.१ ओभरमा १६८ रन जोडेर अलआउट भयो । नेपालका लागि आसिफ शेखले सर्वाधिक ५८ रनको योगदान दिए । यस्तै, कुशल मल्लले ३६, भीम सार्कीले २६, कुशल भुर्तेलले १८ रन तथा करण केसीले १२ रन जोडे ।
नेपालका तीन ब्याट्सम्यान खाता नखोली आउट भए । कप्तान रोहित पौडेल, अनिल शाह र देव खनाल शून्य रनमै पेभिलियन फर्किएका हुन् ।
बलिङतर्फ नामिबियाका बेर्नार्ड स्कोल्ज र जान निकोल लोफ्टी इटोनले चार–चार तथा ज्याक ब्रासेल र जेर्हार्ड इरामसले एक–एक विकेट लिए । यसअघिको खेलमा नामिबियाले नेपाललाई चार विकेटले पराजित गरेको थियो ।
