काठमाडौँ । आईसीसी पुरुष क्रिकेट विश्वकप लिग–२ को त्रिकोणात्मक शृङ्खला अन्तर्गत नेपाल र नामिबियाबीचको खेल जारी छ । नेपालले नामिबियालाई १६९ रनको लक्ष्य दिएको छ । टस हारेर ब्याटिङ थालेको नेपाल ३७.१ ओभरमा १६८ रन जोडेर अलआउट भयो ।
नेपालका लागि आसिफ शेखले सर्वाधिक ५८ रनको योगदान दिए । यस्तै, कुशल मल्लले ३६, भीम सार्कीले २६, कुशल भुर्तेलले १८ रन तथा करण केसीले १२ रन जोडे ।
नेपालका तीन ब्याट्सम्यान खाता नखोली आउट भए । कप्तान रोहित पौडेल, अनिल शाह र देव खनाल शून्य रनमै पेभिलियन फर्किएका हुन् ।
बलिङतर्फ नामिबियाका बेर्नार्ड स्कोल्ज र जान निकोल लोफ्टी इटोनले चार–चार तथा ज्याक ब्रासेल र जेर्हार्ड इरामसले एक–एक विकेट लिए । यसअघिको खेलमा नामिबियाले नेपाललाई चार विकेटले पराजित गरेको थियो ।
