काठमाडौँ । साउदी अरेबियाको जेद्दामा जारी वाफ वुमेन्स च्याम्पिनसिप २०२४ मा नेपालले आज मंगलबार सिरियाको सामना गर्दैछ । खेल किङ अब्दुल्लाह स्पोर्टस सिटीमा नेपाली समयअनुसार ७ः४५ मा सुरु हुनेछ ।
नेपाली महिला राष्ट्रिय टिमले सिरियाको सामना गर्न लागेको यो पहिलो पटक हो । प्रतियोगिता सोमबारदेखि सुरु भएको छ र पहिलो दिनको खेलमा लेबनान र जोर्डन विजयी भएका छन् ।
पश्चिम एसियाली फुटबल महासंघ (वाफ)द्वारा फेब्रुअरी १९ देखि २९ सम्म साउदीको जेद्दामा आयोजना हुने प्रतियोगितामा नेपालसँगै ग्वामले आमन्त्रित टिमको रुपमा प्रतिस्पर्धा गर्दैछ ।
नेपालसहित प्यालेस्टाइन, सिरिया र इराक समूह ‘बी’ मा छन् । यस्तै, समूह ‘ए’ मा डिफेन्डिङ च्याम्पियन जोर्डन, घरेलु टिम साउदी अरेबिया, ग्वाम र लेबनान छन् । समूहका शीर्ष दुई टिम सेमिफाइनललाई छनोट हुने छन् ।
