काठमाडौँ । मलेसिया एसिसी महिला प्रिमियर कप क्रिकेट प्रतियोगिता–२०२४ को फाइनलमा प्रवेश गरेको छ । भर्खरै सम्पन्न खेलमा नेपाललाई चार विकेटले हराउँदै मलेसिया फाइनलमा पुगेको हो । नेपालले दिएको ११६ रनको लक्ष्य मलेसियाले २० ओभरमा ६ विकेटको क्षतिमा पूरा गर्यो ।
अन्तिम समयसम्म रोमाञ्चक बनेको खेलमा मलेसियालाई जित दिलाउन इल्सा हन्टरले ६९ रनको अविजित इनिङ्स खेलिन् । ५३ बल खेलेकी उनले ६ चौका हिर्काइन् । यस्तै, माहिराह इज्जाती इस्माइलले १६, मास इलिसाले १३ रन जोडे ।
बलिङतर्फ नेपालका लागि सिता रानामगर र कविता जोशीले २–२ विकेट लिए भने कविता कुँवर र रुविना क्षेत्रीले १–१ विकेट लिए ।
जितसँगै मलेसियाले आगामी सेप्टेम्बरमा आयोजना हुने एसिया कप क्रिकेटमा सहभागिता जनाउन पाउने भएको छ । प्रतियोगिताको फाइनलमा पुग्ने दुई टोली मलेसियन र युएईले एसिया कप क्रिकेट खेल्ने भएका हुन् ।
यसअघि युएईले थाइल्याण्डलाई चार रनले हराउँदै फाइनलमा स्थान बनाएको हो । एसिया कपमा वुमन्स प्रिमियर कपको फाइनलमा पुगेका यी दुई टोलीसँगै भारत, पाकिस्तान, बंगलादेश र श्रीलंका हुनेछन् ।
