काठमाडौं । प्रदेश २ का प्रदेश प्रमुख डा.राजेश अहिराजले सवारी दुर्घटनामा परी घाइते भएका चालकलाई अस्पताल पुर्याएका छन् । शनिवार कर्णाली प्रदेशको सुर्खेत जिल्लाअन्तर्गत छिन्चु भन्ने ठाउँमा सवारी दुर्घटनामा परी घाइते भएका मिनिट्रकका चालकलाई डा अहिराजले अस्पताल पुर्याउनु भएको हो ।
छिन्चु सडकखण्डमा मिनिट्रक र बा ५ ख ४२०४ नम्बरको सवारीसाधन एकआपसमा ठोक्किँदा मिनिट्रक पल्टिएको थियो । मिनिट्रकका चालक शेरबहादुर सिंह घाइते भएका थिए ।
प्रदेश २ का प्रमुख डा.अहिराज कर्णाली प्रदेश भ्रमणमा रहेकाले दुर्घटनामा घाइते भएको देखेर सिंहलाई आफ्नै गाडीमा राखेर बाँके जिल्लाको कोहलपुर मेडिक कलेज दशबिघामा भर्ना गराउनु भएको हो ।
प्रदेश प्रमुख डा. अहिराजले आफ्नै गाडीमा राखेर आफूले नै अस्पताल पुर्याएको प्रहरीले बताउनुभयो । उहाँका अनुसार घाइते सिंहको टाउको, दाहिने पाखुरा र शरीरको अन्य भागमासमेत चोटपटक लागेको छ ।
