काठमाडौं । नेपाल विद्युत् प्राधिकरणले भोटेकोशी बाढीका कारण प्रभावित नुवाकोटका अधिकांश स्थानमा विद्युत् सेवा पुनःस्थापना गरेको छ।
बाढी प्रभावित जलविद्युत् आयोजनामा कार्यरत कर्मचारी, मजदुर, उनीहरूका परिवार तथा स्थानीय बासिन्दाको उद्धारलाई प्राथमिकतामा राख्दै प्राधिकरणले वैकल्पिक माध्यमबाट विद्युत् आपूर्ति सुचारु गरेको हो।
बाढीका कारण नियमित विद्युत् आपूर्ति प्रणाली प्रभावित भएपछि धादिङ, काठमाडौं र सिन्धुपाल्चोकबाट ६६ केभीको लाइनलाई ११ केभीमा चार्ज गरी नुवाकोटका प्रभावित क्षेत्रमा विद्युत् आपूर्ति गरिएको प्राधिकरणले जनाएको छ।
विद्युत् आपूर्ति पूर्ण रूपमा नियमित हुन समय लाग्ने क्षेत्रमा ब्याकअपको व्यवस्था पनि गरिएको छ। काठमाडौंलगायतका स्थानबाट २५/२५ केभीएका दुई तथा ५० केभीए क्षमताका डिजेल जेनेरेटरसहित चारवटा प्राविधिक टोली नुवाकोट पठाइएको छ।
प्राविधिक टोलीले अस्पताल, दूरसञ्चार सेवा तथा अन्य अत्यावश्यक क्षेत्रमा जेनेरेटर जडान गरी विद्युत् आपूर्ति सुचारु गर्नुका साथै ब्याकअप पावरको व्यवस्था मिलाइरहेको छ। अत्यावश्यक सेवा प्रभावित हुन नदिन वैकल्पिक स्रोतबाट विद्युत् उपलब्ध गराउने काम भइरहेको प्राधिकरणले जनाएको छ।
यस्तै, रसुवा जिल्लामा पनि विद्युत् आपूर्ति सुचारु गर्न विभिन्न विकल्पको तयारी भइरहेको प्राधिकरणले जनाएको छ।
प्राधिकरणका अनुसार बाढीबाट क्षतिग्रस्त विद्युत् संरचनाको प्राविधिक मूल्यांकन गर्दै नियमित विद्युत् आपूर्ति पुनःस्थापनाको काम पनि समानान्तर रूपमा अघि बढाइएको छ।
प्रभावित क्षेत्रमा विद्युत् सेवा यथाशीघ्र सामान्य अवस्थामा फर्काउन उपलब्ध जनशक्ति, उपकरण तथा स्रोतसाधन परिचालन गरी काम भइरहेको प्राधिकरणले जनाएको छ।
