काठमाडौं । सरकारले बाढी, पहिरो, आगलागीलगायत प्राकृतिक विपद्का बेला ज्यान जोखिममा राखेर उद्धार तथा राहत कार्यमा खटिने सुरक्षाकर्मीको भत्ता तथा दैनिक खाजा खर्च बढाउने निर्णय गरेको छ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणको कार्यकारी समितिको बिहीबार बसेको बैठकले विपद्का समयमा अग्रपङ्क्तिमा खटिने सुरक्षा निकायका जनशक्तिको सेवा–सुविधा परिमार्जन गर्ने निर्णय गरेको हो।
नेपाल प्रहरी, सशस्त्र प्रहरी बल र नेपाली सेनाका जनशक्तिले विपद्का समयमा आफ्नै ज्यान जोखिममा राखेर उद्धार, राहत तथा व्यवस्थापनमा पुर्याउँदै आएको योगदानको कदर गर्दै सरकारले उनीहरूको सेवा–सुविधा बढाउने निर्णय गरेको हो।
विपद् व्यवस्थापनको कामलाई अझ प्रभावकारी, द्रुत र परिणाममुखी बनाउन अग्रपङ्क्तिमा खटिने सुरक्षाकर्मीलाई राज्यका तर्फबाट सम्मान र प्रोत्साहनको अनुभूति गराउन आवश्यक रहेकाले सुविधा परिमार्जन गरिएको प्राधिकरणले जनाएको छ।
प्राधिकरणको कार्यकारी समितिको निर्णयका आधारमा सम्बन्धित सुरक्षा निकायले आफ्नो तालुकदार मन्त्रालयमा आवश्यक प्रस्ताव पठाउनुपर्नेछ। त्यसपछि सम्बन्धित मन्त्रालयले आवश्यक निर्णय गरी सेवा–सुविधा कार्यान्वयन गर्ने प्रक्रिया अघि बढाउनेछ।
