एजेन्सी । स्पेनिस फुटबल लिग ला लिगा अन्तर्गत बार्सिलोनाले हार बेहोरेको छ । गएराति भएको खेलमा बार्सिलोना भिल्लारियलसँग घरेलु मैदानमै स्तब्ध बनेको हो ।
एकै खेलमा आठ गोल निस्किएको अवस्थामा बार्सिलोना ५–३ गोलले पराजित हुन पुग्यो । खेलको ४१ औं मिनेटमा जेरार्ड मोरेनेले गोल गर्दै भिल्लारियललाई सुरुवाती अग्रता दिलाएका थिए । ५४ औं मिनेटमा इलियास एखोमाचले गोल थप्दै भिल्लारियलको अग्रता दोब्बर पारे ।
यता, ६० औं मिनेटमा इल्काए गुन्डोवानले गोल गर्दै बार्सिलोनालाई १–२ गोलको अवस्थामा ल्याए । ६८ औं मिनेटमा पेड्रीले गोल गर्दै बार्सिलोनालाई २–२ गोलको बराबरीमा ल्याए । ७१ औं मिनेटमा भिल्लारियलका एरिक बेलीले आत्मघाती गोल गरेपछि बार्सिलोना ३–२ गोलले अघि बढ्यो ।
तर, ८४ औं मिनेटमा गोन्कालो गुएडेसले गोल गर्दै भिल्लारियललाई ३–३ गोलको बराबरीमा ल्याए । भिल्लारियलले इन्जुरी समयमा दुई गोल थप्दै रोमाञ्चक जित निकाल्यो । ९०+९ औं मिनेटमा अलेक्जान्डर सोर्लोठले तथा ९०+१२ औं मिनेटमा जोसे लुइस मोरालेसले गोल गर्दै भिल्लारियललाई ५–३ को रोमाञ्चक जित दिलाए ।
यो नतिजासँगै बार्सिलोना २१ खेलबाट ४४ अंकका साथ तालिकाको तेस्रो स्थानमा छ । भिल्लारियल २२ खेलबाट २३ अंकका साथ १४ औं स्थानमा छ ।
