एजेन्सी । इंग्लिस प्रिमियर लिग फुटबल अन्तरगत आर्सनल शानदार जितका साथ तालिकाको तेस्रो स्थानमा उक्लिएको छ ।
शनिबार भएको खेलमा आर्सनलले क्रिष्टल प्यालेसमाथि ५–० गोलको एकतर्फी जित निकालेको हो ।
आर्सनललाई जित दिलाउन ग्याब्रिएल मार्टिनेलीले २ गोल गर्दा लियान्द्रो ट्रोसार्ड र गेब्रियल मेगहेल्सले एक-एक गोल गरे । एक गोल भने आर्सनलले उपहारस्वरुप पाएको थियो ।
११ औँ मिनेटमा गेब्रियल मेगहेल्सले गोल गर्दै आर्सनललाई अग्रता दिलाएका थिए । ३७ औँ मिनेटमा क्रिष्टलका डिन हेन्डरसनले आफ्नै पोस्टमा गोल गरेपछि आर्सनल २–० ले अघि बढेको थियो ।
ट्रोसार्डले ५९ औँ मिनेटमा टिमका लागि तेस्रो गोल गरेका थिए । अतिरिक्त समयको चौथो र पाँचौँ मिनेटमा ग्याब्रिएल मार्टिनेलीले लगातार २ गोल गर्दै आर्सनललाई ५–० को फराकिलो जित दिलाए ।
जितपछि आर्सनल ४३ अङ्कका साथ तालिकाको तेस्रो स्थानमा उक्लिएको छ । समान ४३ अङ्क भएको एस्टन भिल्ला चौथो स्थानमा झरेको छ भने दोस्रो स्थानमा रहेको म्यानचेस्टर सिटीको पनि ४३ नै अङ्क रहेको छ ।
लिभरपुल ४५ अङ्कका साथ शीर्ष स्थानमा रहदा आर्सनलसँग पराजित क्रिष्टल प्यालेस भने १४ औँ स्थानमा छ ।
