न्यूयोर्क । अमेरिकाका कतिपय स्थानमा हावाहुरीका कारण जनजीवन अस्तव्यस्त समेत भएको छ भने कतै बाक्लो हिउँ परेका कारण सयौं उडान रद्द भएका छन् । यसका साथै हावाहुरीले यस क्षेत्रको विद्युत् आपूर्तिमा पनि असर गरेको छ ।
यस वर्ष अधिक हिमपात भएको बताइएको छ र यसबाट विद्युत् समेत कटौती हुने क्रम बढेको छ । धेरैजसो ठाउँमा तापक्रम शून्यभन्दा तल झरेपछि लाखौं अमेरिकीहरूले ज्यादै चिसोको सामना गर्नु परेको छ ।
न्यूयोर्क बफेलोमा २ फिटसम्म हिमपात भएको छ । उच्च हावा, हिउँ र बरफ मिसिएको वर्षाले रूखहरू र विजुलीका पोलहरु ढालेका पनि देखिएको छ । अमेरिकाको मेरिल्याण्ड, न्यूयोर्क, डिसी, नर्थक्यारोलिना आयोवा कोलोराडो, कनेक्टिकट, जर्जिया, ओक्लाहोमा, टेक्सस, वेस्ट भर्जिनिया, विस्कनसिन लगायतका राज्यमा हिमपातले जनजिबन अस्तव्यस्त बनाएको छ।
हिमपातका कारण सडक दुर्घटना समेत बढेको बताइएको छ भने राज्य संयन्त्रले सुचना जारी गर्दै सवारी साधन चलाउँदा सावधानी अपनाउन अनुरोध गरेका छन् । यहाँका मुख्य राजमार्गहरुमा हिमपातका कारण दुर्घटना भएका गाडीहरु सडकको दायाँबायाँ प्रशस्तै देख्न पाईन्छ । बाटोमा हिउँ पन्छाउने डोजरहरु कुदिरहेका देख्न सकिन्छ भने सर्वसाधारण मानिसहरु छिटफुट बाहेक बाहिर निस्किएका छैनन् । व्यक्तिहरुले आफ्नो घर अगाडि हिउँ पगाल्न नुन खन्याई रहेको देखिन्छ ।
लामो समयदेखि न्यूयोर्कको बफेलोमा बस्दै आउनुभएका नेपाली लोकनाथ अधिकारीका अनुसार हिमपातले त्यहाँको जनजीवन अस्तव्यस्त बनाएको छ । सडकमा सबारी साधनहरु फसेका देखिएको छ । अधिकारीले भन्नुभयो, बढ्दो चिसोका कारण बिजुली बत्तिमा अबरोध भएको छ भने पानीका पाईपहरु फुटेर पानी आपूर्तिमा पनि अवरोध उत्पन्न भएको छ ।
यसैगरी अमेरिकाको एक प्रमुख पर्यटकीय स्थल नायग्रा फल्स पनि हिउँले ढाकेको छ । सोही स्थानमा व्यवसाय गर्दै आउनुभएका रघु भट्टराईका अनुसार यतिबेला यो पर्यटकीय क्षेत्रमा शुन्यता छाएको छ । मानिसहरु त्यहाँ पुग्न नसकेपछि यो पर्यटकीय स्थालमा पनि चहल पहल ठप्प छ ।
भट्टराईका अनुसार नायग्राको झरना तल खस्न नपाउँदै जम्ने गरेको छ । सडक पनि हिउँले ढाकेको हुँदा त्यहाँसम्म नै मानिसहरु पुग्न सकेका छैनन् । साथै यहाँ बसोबास गर्दै आएका मानिसहरु पनि अत्यावश्यक काम बाहेक बाहिर निस्कन सकेका छैनन् ।
