काठमाडौँ । जापानमा कारको ठक्करबाट रुकुम पश्चिमका एक दम्पतीले ज्यान गुमाएका छन् ।
रुकुम पश्चिमको त्रिवेणी गाउँपालिका २ विमैचाका पदम विष्ट र उनकी श्रीमती लालसरी विष्टको शनिबार साँझ मा जापानको उरासो सहरमा निधन भएको हो ।
उक्त सहरको जियोवान सिटीमा जेब्रा क्रसिङबाट बाटो काटिरहेका बेला विष्ट दम्पतीलाई कारले ठक्कर दिएको थियो ।
कारको ठक्करबाट अचेत अवस्थामा रहेका दुवै जनालाई उद्धार गरी अस्पताल पुर्याइएको थियो । तर अस्पतालले दुवै जनालाई मृत घोषणा गरेको हो ।
कार चालक ८० वर्षीय एक वृद्धालाई जापानस्थित उरासो प्रहरीले नियन्त्रणमा लिएको बताइएको छ ।
विष्ट दम्पती जापानमा बस्दै आएका छोरा बुहारी र नातीलाई भेट्न गत कात्तिकमा ३ महिनाको टुरिस्ट भिसामा जापान गएका थिए ।
