एजेन्सी । अस्ट्रेलियाका ब्याट्सम्यान डेभिड वार्नरले टेष्ट र एकदिवसीय क्रिकेटबाट सन्यासको घोषणा गरेका छन् ।
उनले जनवरी ३ देखि सिड्नीमा पाकिस्तानविरुद्ध आफ्नो करियरको अन्तिम टेस्ट खेल्नेछन् । वार्नरले सोमबार टेष्टसँगै एकदिवसीयबाट सन्यास लिने र टी–२० ढाँचामा खेल्न जारी राख्ने घोषणा गरेका छन् ।
यससँगै उनले आफ्नो प्रदर्शन राम्रो भएमा र सन् २०२५ मा हुने च्याम्पियन्स ट्रफीमा टिमलाई आवश्यक परेमा आफू उपलब्ध हुने पनि बताए ।
गत वर्ष भारतमा भएको एकदिवसीय विश्वकपमा अष्ट्रेलियाका लागि डेभिड वार्नर सर्वाधिक स्कोरर बनेका थिए । उनले एकदिवसीय विश्वकपमा खेलेका ११ खेलमा ४८.६३ को औसतमा ५३५ रन बनाए । उनको स्ट्राइक रेट १०८.२९ थियो । उनले २ शतक र २ अर्धशतक पनि प्रहार गरेका थिए ।
