काठमाडौँ । नेपालको पहिलो र एकमात्र फ्रेन्चाइज लिग फुटबल नेपाल सुपर लिग (एनएसएल)को दोस्रो संस्करण आज शुक्रबारदेखि सुरु हुँदैछ ।
आजको उद्घाटन खेलमा साविक विजेता काठमाडौं रेजर्स र नयाँ टोली स्पोर्टिङ इलाम एफसीबीच प्रतिस्पर्धा हुँदैछ । दुई टोलीबीचको खेल त्रिपुरेश्वरस्थित दशरथ रंगशालमा साँझ ६ बजे सुरु हुनेछ ।
त्यसअघि उद्घाटन समारोह हुनेछ । उद्घाटन समारोहमा विभिन्न सांगीतिक प्रस्तुति समेत राखिएको छ ।
काठमाडौंको मार्कीमा राष्ट्रिय टिमका फरवार्ड हिसुब थपलिया छन् भने मुख्य प्रशिक्षकमा बालगोपाल महर्जन यथावत छन् ।
यस्तै पहिलो संस्करणमा काठमाडौंलाई उपाधि दिलाएका गोलकिपर विकेश कुथु यस पटक भने इलामको मार्की छन् । इलामको मुख्य प्रशिक्षकमा मेघराज केसी छन् । केसीले पहिलो सिजन भने एफसी चितवनको प्रशिक्षण सम्हालेका थिए ।
पहिलो संस्करणमा सात फ्रेन्चाइज टोलीले प्रतिष्पर्धा गरेका थिए । दोस्रो संस्करणमा तीन नयाँ टोली थपिएको थियो । यद्यपि, पहिलो संस्करण खेलेको विराटनगर सिटी एफसीले भने दोस्रो संस्करण नखेल्ने भएसँगै ९ टोलीले यसपटकको एनएसएलमा प्रतिस्पर्धा गर्नेछन् ।
इलाम स्पोर्टिङ, झापा एफसी र वीरगञ्ज युनाइटेडले पहिलो पटक फ्रेन्चाइज लिग खेल्दैछन् । गत संस्करणको टोली काठमाडौं रेजर्स, ललितपुर सिटी एफसी, एफसी चितवन, पोखरा थन्डर्स, बुटलव लुम्बिनी एफसी र धनगढी एफसीले दोस्रो संस्करणमा पनि प्रतिस्पर्धा गर्दैछन् ।
