काठमाडौं। जबरजस्ती करणी तथा विद्युतीय कारोबार ऐनअन्तर्गतको कसुरमा फरार रहेका झापाका एक प्रतिवादीलाई इन्टरपोलको रेड नोटिसका आधारमा ओमानबाट पक्राउ गरी नेपाल ल्याइएको छ ।
पक्राउ पर्नेमा झापा बिर्तामोड नगरपालिका–३ का बिमल राजवंशी रहेका छन् । उनीविरुद्ध अन्तर्राष्ट्रियस्तरमा खोजतलास तथा पक्राउ गर्न नेपाल प्रहरी प्रधान कार्यालय, अपराध अनुसन्धान विभागअन्तर्गतको इन्टरपोल शाखाको अनुरोधमा इन्टरपोल महासचिवालयले २०२६ मे १३ मा रेड नोटिस जारी गरेको थियो ।
इन्टरपोलको नेसनल सेन्ट्रल ब्युरो (एनसीबी) काठमाडौं र एनसीबी मस्कट, ओमानको समन्वयमा राजवंशीलाई ओमानबाट पक्राउ गरिएको प्रहरीले जनाएको छ ।
पक्राउपछि उनलाई नेपाल ल्याउन एनसीबी काठमाडौंले प्रहरी टोली ओमन पठाएको थियो । उक्त टोलीले कतार एयरवेजमार्फत राजवंशीलाई नेपाल ल्याएको हो ।
प्रहरीका अनुसार राजवंशी शनिबार साँझ ४ बजेर २९ मिनेटमा नेपाल आइपुगेका थिए । नेपाल आइपुगेपछि उनलाई नियन्त्रणमा लिएर सम्बन्धित कसुरमा थप अनुसन्धान अघि बढाइएको छ ।
विदेशमा लुकेर बसेका तथा विभिन्न आपराधिक घटनामा फरार रहेका नेपाली नागरिकलाई अन्तर्राष्ट्रिय प्रहरी सञ्जालमार्फत खोजी तथा पक्राउ गर्ने क्रममा पछिल्लो समय नेपाल प्रहरीले इन्टरपोलसँगको समन्वयलाई तीव्र बनाउँदै आएको छ ।
