एजेन्सी । पाकिस्तानका पूर्व क्रिकेटर वसिम अकरमले सेमिफाइनल खेल्ने टोलीका लागि नयाँ सूत्र भनेका छन् । ‘ए स्पोर्ट्स’ च्यानलसँग कुरा गर्दै अक्रमले व्यंग्य गर्दै भने, ‘पहिले ब्याटिङ गर्दै राम्रो स्कोर गरे पाकिस्तानले सेमिफाइनलमा पुग्न सक्छ र त्यसपछि इङ्ल्यान्डको सम्पूर्ण टोलीलाई २० मिनेटसम्म ड्रेसिङ रुममा थुनिदिनुपर्छ ताकि टाइम आउट होउस् ।’
अकरमले नोभेम्बर ६ मा श्रीलंकाका एन्जेलो म्याथ्युजसँगको टाइमआउटको घटनालाई सम्झँदै यस्तो भनेका हुन् । बंगलादेश र श्रीलंकाबीच नोभेम्बर ६ मा दिल्लीमा भएको विश्वकपको खेल इतिहासको पानामा एउटा विशेष घटनाका लागि लेखिएको छ ।
श्रीलंकाको इनिङ्समा एन्जेलो म्याथ्युजलाई टाइम आउट दिइएको थियो । अन्तर्राष्ट्रिय क्रिकेटमा ब्याट्सम्यान टाइमआउट भएको यो पहिलो पटक हो ।
श्रीलंकाको चौथो विकेट खसेपछि म्याथ्युज ब्याटिङमा आए तर उनले स्ट्राइक लिन २ मिनेटभन्दा बढी समय लिए । यसैबीच बंगलादेशका कप्तान शकिब अल हसनले टाइम आउटका लागि अपिल गरेपछि अम्पायरले म्याथ्युजलाई आउट घोषणा गरेका थिए ।
पाकिस्तान र इङ्ल्यान्डबीचको यो खेल नोभेम्बर ११ मा अर्थात् भोलि कोलकाताको इडेन गार्डेनमा हुँदैछ । बिहीबार श्रीलंकालाई ५ विकेटले पराजित गर्दै न्यूजिल्याण्डले विश्वकप २०२३ को सेमिफाइनलको दौडबाट अफगानिस्तान र पाकिस्तान दुवैलाई लगभग बाहिर गरिसकेको छ ।
श्रीलंकाविरुद्धको खेलमा जितपछि न्युजिल्यान्डको नेट रन रेट ०.७४३ पुगेको छ । पाकिस्तानको नेट रन रेट हाल ०.०३६ छ । पाकिस्तानले सेमिफाइनलमा पुग्ने हो भने इङ्ल्यान्डलाई लगभग असम्भव अन्तरले हराउनुपर्छ ।
पहिलो – पाकिस्तानले पहिले ब्याटिङ गरेमा २८७ रनले जित्नुपर्नेछ । त्यसपछि उसको पनि १० अंक हुनेछ र नेट रन रेट न्यूजिल्याण्ड भन्दा राम्रो हुनेछ । एकदिवसीय इतिहासमा पाकिस्तानको अहिलेसम्मकै सबैभन्दा ठूलो जित २५५ रनको छ ।
दोस्रो – यदि पाकिस्तानले लक्ष्य पछ्याउने हो भने २७८ देखि २८४ बल बाँकी रहँदै लक्ष्य पछ्याउनु पर्नेछ । अर्थात् लक्ष्य अनुसार उसले १६ देखि २२ बल भित्र खेल जित्नुपर्नेछ । आजसम्म विश्वको कुनै पनि टोलीले एकदिवसीय क्रिकेटमा यति थोरै बलमा लक्ष्य हासिल गर्न सकेको छैन ।
