म्याड्रिड । शनिबार स्पेनी ला लिगामा भएको एल क्लासिकोमा रियल म्याड्रिडले बार्सिलोनालाई २–१ ले हराएको छ । जितसंगै रियल म्याड्रिड स्पेनी ला लिगाको शीर्ष स्थानमा उक्लेको छ । अल्फ्रेडो डी स्टेफानो स्टेडियममा भएको खेलमा रियलले करिम बेन्जेमाको गोलले अग्रता लिएको थियो ।
लिगका पछिल्ला सात खेलमा उनको यो नवौं व्यक्तिगत गोल हो । टोनी क्रुसले रियलका लागि दोस्रो गोल थपे । बार्सिलोनाका तर्फबाट ओस्कर मिगुएजाले एक गोल फर्काए । खेलको अन्त्यतिर रियल १० खेलाडीमा सीमित रह्यो ।
कासेमिरालाई रातो कार्ड देखाइएको थियो । यो नतिजापछि रियल र छिमेकी एट्लेटिको म्याड्रिडको समान ६६ अंक भएको छ । रियल हेड टु हेडमा अगाडि रहेको हो । जनवरीको अन्त्यसम्म एट्लेटिकोलाई शीर्ष स्थानमा १० अंकको अग्रता प्राप्त थियो । बार्सिलोना भने ६५ अंकसाथ तेस्रो स्थानमा छ । एट्लेटिकोले आइतबार रियल बेटिसको सामना गर्दै छ ।
