काठमाडौँ : यहाँस्थित पाकिस्तानी दूतावासले लामो समयदेखि विवादमा रहेको काश्मिरका विषयमा आज छलफल गरेको छ । दूतावासमा भएको छलफलमा विश्लेषक, विद्धान, प्रतिष्ठित पत्रकारलगायतको उपस्थिति थियो ।
छलफलका क्रममा पाकिस्तानका राष्ट्रपति, प्रधानमन्त्री र परराष्ट्रममन्त्रीको सन्देश पढेर सुनाइएको थियो । राष्ट्रपति आरिफ अल्वीले आफ्नो सन्देशमा आत्मनिर्णयको अधिकारका लागि न्यायसङ्गत सङ्घर्षमा क्रममा ज्यान गुमाउने काश्मिरीहरुप्रति श्रद्धाञ्जली अर्पण गर्नुभयो । उहाँले मानव अधिकार उल्लङ्घन र त्यहाँका जनतालाई आर्थिक, राजनीतिक र भूमिसम्बन्धी अधिकारलगायतका विषयमा चर्चा गर्नुभएको थियो ।
प्रधानमन्त्री अनवर उल हकले आफ्नो सन्देशमा काश्मिरीहरुलाई पाकिस्तानको पूर्ण साथ र समर्थन रहेको भन्दै काश्मिरी जनताको वैधानिक र आत्मनिर्णयको अधिकार प्राप्ति नभएसम्म पाकिस्तानको ऐक्यबद्धता रहेको स्पष्ट पार्नुभयो । उहाँले काश्मिरमा अन्तर्राष्ट्रिय मानव अधिकार र मानवीय संस्था, अन्तर्राष्ट्रिय सञ्चारमाध्यमको पहुँच हुनुपर्नेमा जोड दिनुभयो ।
पाकिस्तानका परराष्ट्रमन्त्री जलिल अब्बास जिलानीले आफ्नो सन्देशमा काश्मिर लडाइँमा ज्यान गुमाउनेप्रति श्रद्धाञ्जली अर्पण गर्नुभयो । नेपालका लागि पाकिस्तानका कार्यबाहक राजदूत उमेर अलीले काश्मिरमा लामो समयदेखि चलिरहेको विवाद र संयुक्त राष्ट्रसङ्घ सुरक्षा परिषद्का विभिन्न प्रस्तावका विषयमा चर्चा गर्नुभएको थियो ।
