इङलिस प्रिमियर लिग अन्तर्गत शनिबार सम्पन्न पहिलो खेलमा लिभरपुलले मोहम्मद सलाहको २ गोल मद्दतले एभर्टनलाई २–० गोल अन्तरले पराजित गरेको छ ।
यो जितसँगै लिभरपुल लिगको पहिलो स्थानमा उक्लिएको छ । यद्यपी आजै म्यान्चेस्टर सिटीले ब्राइटनलाई पराजित गरे सिटी पहिलो स्थानमा पुग्नेछ ।
आजको खेलमा लिभरपुलले एभर्टनमाथि निरन्तर दबाब दिँदै आक्रमण गरेको थियो । तर पहिलो गोल भने ७५ औं मिनेटमा पेनाल्टी मार्फत प्राप्त भएको थियो । उक्त गोल मोहम्मद सलाहले गरेका थिए ।
अर्को गोल पनि सलाहकै नाममा थियो । प्रत्याक्रमणका क्रममा सलाहले इन्जुरी समयको ९७ औं मिनेटमा डार्विन नुनेजले दिएको क्रस पासमा सुन्दर गोल गरेका थिए ।
एभर्टनका एस्ले योङले ३७ औं मिनेटमा दुईवटा पहेंलो कार्ड पाएसँगै रातो कार्ड पाएर मैदान छाड्नु परेपछि एभर्टन १० खेलाडीमा सीमित भएको थियो जसका कारण एभर्टनको खेल असन्तुलित हुन पुगेको थियो । एजेन्सी
