बिराटनगर । कोशी प्रदेशको मुख्यमन्त्रीमा शेखर कोइराला निकट केदार कार्कीलाई समर्थन गरेका सांसदहरु प्रदेश प्रमुखको कार्यालय पुगेका छन् ।
कार्कीले आफ्नो दल कांग्रेसका ८ र एमालेका ३९ प्रदेश सांसदको हस्ताक्षरसहित दाबी पेश गरेका छन् । देउवाले मुख्यमन्त्रीमा नेकपा माओवादीका इन्द्र आङबोलाई समर्थन गर्ने निर्णय गरेपनि कार्कीले मुख्यमन्त्रीमा दावी गरेका हुन् ।
संविधानको धारा १६८ (५) अनुसार सरकार गठनका लागि लागि दाबी पेश गर्न प्रदेश प्रमुख परशुराम खापुङले दिएको समय सकिएको छ ।
मुख्यमन्त्रीमा गठबन्धनका तर्फबाट इन्द्र आङ्बोले पनि कांग्रेस, माओवादी केन्द्र, एकीकृत समाजवादी, जसपासहित ४७ जना सांसदको हस्ताक्षर बुझाएर दाबी गरेका छन् । दुबैतर्फको दबाब बढेपछि प्रदेश प्रमुख कानुनी परामर्शमा छन् ।
