विराटनगर: नेकपा एमालेका नेता एवं मुख्यमन्त्री हिक्मत कुमार कार्कीले पदबाट राजीनामा दिएपछि कोशी प्रदेशको सरकार गठनको नयाँ दौर फेरि सुरु भएको छ ।
प्रदेश प्रमुख परशुराम खापुङले नयाँ सरकार गठनका लागि दलहरुलाई आफ्नो दाबी पेश गर्न सात दिनको समय दिएका छन् । उनले संविधानको धारा १६८(५) बमोजिमको सरकार गठनका लागि आह्वान गरेका हुन् । यस धारा अनुसार प्रदेश सभामा सबैभन्दा बढी सांसदको मत (हस्ताक्षर) ल्याउने व्यक्ति मुख्यमन्त्री हुने प्रावधान छ ।
प्रदेश प्रमुखको सूचनामा भनिएको छ, कोशी प्रदेश सभामा विश्वासको मत प्राप्त गर्नसक्ने कोशी प्रदेश सभाका कुनैपनि सदस्यलाई २०८० असोज २६ गते शुक्रबार अपराह्न ५ बजेभित्र आफ्नो दाबी पेश गर्न आह्वान गर्नु भएको छ ।
यस व्यवस्था बमोजिम दाबी पेश गरे पनि संसदबाट विश्वासको मत लिनुपर्ने हुन्छ जुन असफल भएमा कोशी प्रदेशमा चुनावको विकल्प रहने छैन ।
