काठमाडौं । माओवादीले कारबाही गरेपछि रिक्त रहेको राष्ट्रिय सभाको सदस्य पदका लागि हुन लागेको निर्वाचनमा नेकपा एमालेले रामबहादुर थापा बादललाई नै उम्मेदवार बनाउने भएको छ ।
सो पार्टीका नवनियुक्त स्थायी समिति सदस्य तथा गृहमन्त्री बादललाई उम्मेदबार बनाउने निर्णय एमालेले आज गरेको हो । यसअघि नेकपा माओवादी केन्द्रबाट निर्वाचित बादललाई पार्टीले कारवाही गरेपछि उनको राष्ट्रिय सभा सदस्यको पद गुमेको थियो । त्यसपछि सो पद हालैमात्र रिक्त भएको हो ।
राष्ट्रियसभाको रिक्त पदका लागि निर्वाचन आयोगले बिहीबार मात्र उप निर्वाचनको मिति तोकेको थियो । आयोगले थापाको रिक्त स्थानमा राष्ट्रियसभा सदस्य चयनका लागि जेठ ६ गते निर्वाचनको मिति तोकेको हो ।
यो निर्णयले माओवादी अध्यक्ष प्रचण्डलाई झट्का दिने भएको छ । यसअघि माओदीबाट निर्वाचित उनलाई ओली पक्षको एमालेमा लागेको भन्दै प्रचण्डले कारबाही गरी सांसदबाट बर्खास्त गर्नु भएको थियो।
