काठमाडौँ । काठमाडौँ महानगरपालिकाले स्कुल तथा वडाहरूमा क्रिकेट नेट राख्ने व्यवस्था गर्ने भएको छ । बागमती प्रदेश क्रिकेट सङ्घको प्राविधिक सहयोगमा स्थानीयलाई खेल्ने वातावरण तयार पार्ने भन्दै महानगरले यस्तो व्यवस्था गर्ने भएको हो ।
काठमाडौँ महानगरका मेयर बालेन शाहले काठमाडौँमा खेल्ने वातावरण नभएको भन्दै स्थानीय सरकारको दायित्व स्थानीय जनतालाई खेल्ने वातावरण तयार पार्ने रहेको र त्यसको अनुरूप प्रदेश क्रिकेट सङ्घको प्राविधिक सहयोगमा केही स्कुलहरू तथा वडाहरूमा क्रिकेट नेट राख्ने व्यवस्था गर्न लागेको जनाएका छन् ।
यस्तै, क्रिकेट सिक्न जाने खेलाडीहरूको लागि प्रशिक्षकको अभाव रहेको भन्दै शाहले सङ्घको सहकार्यमा काठमाडौं क्रिकेट प्रशिक्षक विकास कार्यक्रम, आइसिसी लेभल 0 क्रिकेट कोच विकास कार्यक्रम सुरु गर्ने पनि बताए । जसअन्तर्गत ५० नयाँ क्रिकेट प्रशिक्षकहरूलाई तालिम दिई त्यसपछि सहर भरका इच्छुक खेलाडीहरूलाई क्रिकेटको ज्ञान र सीपहरू फैलाउन सहयोग गर्ने मेयर शाहको भनाई छ ।
यस्ता कार्यक्रममार्फत युवाहरूलाई अनुशासन, टिम वर्क र नेतृत्व कौशल विकास गर्ने ठाउँ दिने, ट्यालेन्ट पूलः क्रिकेट प्रतिभाको संख्या बढाई, राष्ट्रिय र अन्तर्राष्ट्रिय स्तरहरूमा सम्भावित प्रतिनिधिहरूको पहिचान गरी क्षमता अभिवृद्धि गर्ने मेयर शाहको विश्वास छ ।
